ಸಮಾಪನಗೊಂಡಿತು 2ನೇ ವರ್ಷದ ಪಚ್ಚೆಪರ್ಬ
ಸುದ್ದಿ 9ಬಂಟ್ವಾಳ: ಬಂಟ್ವಾಳದ ಅರಿವು ಪಚ್ಚೆ ಬಳಗ ಮತ್ತು ಮಣಿನಾಲ್ಕೂರಿನ ರಂಗಸಾಂಗತ್ಯ ಸಂಸ್ಥೆಗಳು ಆಯೋಜಿಸಿದ್ದ 2ನೇ ವರ್ಷದ ಪಚ್ಚೆಪರ್ಬ ಮಕ್ಕಳ ರಜಾ ಶಿಬಿರವು ಕಳೆದ ಭಾನುವಾರ (ಎಪ್ರಿಲ್ 13) ಮಕ್ಕಳ ಹಾಡು, ನಗು, ಸಂತಸದ ಹಿಮ್ಮೇಳದೊಂದಿಗೆ ಮಣಿನಾಲ್ಕೂರು ಹಸಿರು ಅಂಗಳದ ‘ಕೆರೆಕರೆ’ಯಲ್ಲಿ ಸಮಾಪನಗೊಂಡಿತು.
ಸೀಡ್ಬಾಲ್ (ಬೀಜಸಹಿತ ಚೆಂಡು) ಆಟದ ಮೂಲಕ ಮೂರು ದಿನಗಳ ಶಿಬಿರದ ಆಶಯಗಳಿಗೆ ಮುನ್ನಡಿಯಿಡಲಾಗಿತ್ತು. ಸೀಡ್ಬಾಲ್ನೊಳಗೆ ಜಗತ್ತಿನ ಜೀವಜಾಲದ ಗುಟ್ಟು ಹೊತ್ತ ‘ಬೀಜ’ಕ್ಕೆ ಶರಣು ಹೇಳುತ್ತಾ ಧಾನ್ಯವನ್ನು ಧ್ಯಾನ ಮಾಡುತ್ತಾ ಶಿಬಿರವು ಸಮಾಪನಗೊಂಡಿತು. ನೇರಳೆಕಟ್ಟೆಯ ಉದ್ಘಾಟನೆ ಮತ್ತು ಅತಿಥಿಗಳ ಮಾತು, ನಿಲೆಜಾಲ್ನ ಮಕ್ಕಳ ವಿಶಿಷ್ಟ ಆಟಗಳು, ಉಜ್ಜಾಲ್ದಡಿಯ ಮಕ್ಕಳ ನೆನಪಿನ ಜೀಕಾಟ, ‘ಅಟ್ಟದ ಇಲ್ಲ್’ನ ಮರದ ಮನೆಯ ಬದುಕು, ‘ನೇಲೆಚಕ್ರ’ದ ನೇತಾಟ, ‘ಕೂಸಮ್ಮಜ್ಜಿನ ಇಲ್ಲ್’ನ ಮಾತು-ಕಥೆ- ಮರದ ಗರಿಗಳ ಆಟಿಕೆಗಳು, ‘ಮಾಂಟೆ’ಯೆಂಬ ನೆನಪಿನ ಗುಹೆ, ಕೆರೆಕರೆಯ ಸಾವಯವ ವೇದಿಕೆ, ಗ್ರಹ-ನಕ್ಷತ್ರಗಳನ್ನು ಕಾಣಿಸಿದ ಖಗೋಳ ವೀಕ್ಷಣೆ, ಸಾವಯವ ಊಟ-ಕಷಾಯ-ತಿಂಡಿಗಳು, ಸಿಂಪನಿ ಬಳಗದ ಆಟ-ಹಾಡು-ನಾಟಕ, ಎಂಡೋಸಲ್ಫಾನ್ ದುರಂತವನ್ನು ಮನಮುಟ್ಟಿಸಿದ ಇಂದ್ರಪ್ರಸ್ಥ ಉಪ್ಪಿನಂಗಡಿಯ ಮಕ್ಕಳ ‘ಇದು ಸತ್ಯ’ ನಾಟಕ ಮುಂತಾದ ನೂರಾರು ಹೊಸತುಗಳನ್ನು ಈ ವರ್ಷದ ಪಚ್ಚೆಪರ್ಬ ದಾಖಲಿಸಿತು.
ಈ ಹಸಿರು ಹಾದಿಗೆ ಶಿಬಿರ ಗೀತೆಯಾಗಿ ಜನಾರ್ದನ ಕೆಸರಗದ್ದೆ ಅವರ ‘ಅಪ್ಪಿಕೋ ಮರವಾ.. ಒಪ್ಪಿಕೋ ಸುಸ್ಥಿರ ಜೀವನವಾ..’ ಮತ್ತು ‘ಕನಸುಗಾರರು ನಾವು ಕನಸುಗಾರರು. ಕನಸು ನನಸು ಮಾಡುವಂಥ ಹುಡುಗ ಹುಡುಗೀರು..’ ಹಾಡುಗಳನ್ನು ಅಕ್ಷರಶಃ ನಿಜಾರ್ಥದ ಆಶಯವಾಗಿ ಬಳಸಿಕೊಳ್ಳಲಾಗಿತ್ತು.
ಮೂರು ದಿನಗಳಲ್ಲಿ ಹಸಿರು ಅತಿಥಿಗಳಾಗಿ ಡಾ. ಪ್ರವೀಣ್ ಸೆರಾ, ಶ್ರೀಮತಿ ವನಿತಾ, ನಾಣಯ್ಯ ಮಡಿಕೇರಿ, ಹಾಜಬ್ಬ ಹರೇಕಳ, ಶಿವಗಿರಿ ಕಲ್ಲಡ್ಕ, ಕೃಷ್ಣಪ್ಪ ಬಂಬಿಲ, ಜೇಸೀ ಸುಧಾಕರ ಪೂಜಾರಿ ಕಾರ್ಕಳ, ಬೆಂಗಳೂರಿನ ರಮೇಶ ಚಿಮಾಚನಹಳ್ಳಿ, ಪ್ರೇಮಾನಂದ ಕಲ್ಮಾಡಿ ಉಡುಪಿ, ವಾಣಿ ಪೆರಿಯೋಡಿ, ಉದಯ್ ಕುಮಾರ್ ಜ್ಯೋತಿಗುಡ್ಡೆ, ಬಹುಜನ ಚಿಂತಕ ಪಿ. ಡೀಕಯ್ಯ, ಪರಿಸರ ಪರ ಕಲಾವಿದ ದಿನೇಶ ಹೊಳ್ಳ, ಖಗೋಳ ಮಿತ್ರ ಸೂರಜ್ ಮಂಗಳೂರು, ಕೆದ್ದಳಿಕೆ ರಮೇಶ್ ನಾಯಕ್, ಮೋಹನ್ ಟೈಲರ್, ರೋಹಿಣಾಕ್ಷ ಶಿಲರ್ಾಲು, ತುಮಕೂರು ಸಿಗ್ನಾ ಸಂಸ್ಥೆಯ ಸೌಂದರ್ಯ ಮತ್ತು ಮಲ್ಲಿಕಾಜರ್ುನ್, ಶಿವಾನಂದ ಡಿ. ನಾಯ್ಕ್ ಉಳಿ, ಸತೀಶ್ ಕಕ್ಕೆಪದವು, ಅರಿವು ಯುವ ಸಂವಾದ ಕೇಂದ್ರದ ಯುವಜನರು ಸೇರಿದಂತೆ ಹಲವಾರು ಮಂದಿ ಜೊತೆಗಿದ್ದರು.