ಕೈಕಂಬ : ಧರ್ಮದ ವಿಷಯದಲ್ಲಿ ಯಾವತ್ತೂ ರಾಜಿ ಮಾಡಿಕೊಳ್ಳದೆ, ಸತ್ಯಕ್ಕಾಗಿ ಹೋರಾಡುತ್ತಿರುವ ನೇರಾನೇರ ನುಡಿಯ ಶ್ರೀ ವಜ್ರದೇಹಿ ಕ್ಷೇತ್ರದ ಸ್ವಾಮೀಜಿಯವರ ಪ್ರೀತಿ ಮತ್ತು ಆತ್ಮೀಯತೆ ಮರೆಯುವಂತಿಲ್ಲ ಎಂದು ಭಾಗವತ ಪಟ್ಲ ಸತೀಶ್ ಶೆಟ್ಟಿ ಹೇಳಿದರು.
ಗುರುಪುರ ಶ್ರೀ ವಜ್ರದೇಹಿ ಮಠದಲ್ಲಿ ಮೇ. ೧೪ರಂದು ಶನಿವಾರ ನಡೆದ ಶ್ರೀ ನರಸಿಂಹ ಜಯಂತಿ ಮಹೋತ್ಸವ’ ಅಂಗವಾಗಿ ಸಂಜೆ ವಜ್ರದೇಹಿ ಮಠದ ಆವರಣದಲ್ಲಿ ಆಯೋಜಿಸಲಾದ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮೇಳದವರ(ಪಾವಂಜೆ) `ಧರ್ಮ ಸಿಂಹಾಸನ’ ಯಕ್ಷಗಾನ ಬಯಲಾಟದ ಸಂದರ್ಭದಲ್ಲಿ ಮೇಳದ ಮದ್ದಳೆಗಾರ ಬೊಳಿಂಜಡ್ಕ ಗುರುಪ್ರಸಾದ್, ಯಕ್ಷಗಾನ ಕಲಾವಿದ ಮದೂರು ರಾಧಾಕೃಷ್ಣ ನಾವಡ, ಕರ್ಣಾಟಕ ಬ್ಯಾಂಕ್‌ನ ಆಡಳಿತ ನಿರ್ದೇಶಕ ಮಹಾಬಲೇಶ್ವರ ಭಟ್ ಎಂ ಎಸ್ ಹಾಗೂ ಕೃಷಿಕೆ ಶೋಭಾ ಶೆಟ್ಟಿ ಬಳ್ಕುಂಜೆ ಅವರಿಗೆ ಹಮ್ಮಿಕೊಂಡ ಸನ್ಮಾನ-ಸಭಾ ಕಾರ್ಯಕ್ರಮದಲ್ಲಿ ಮಾತನಾಡಿದರು.
ಶ್ರೀ ಕ್ಷೇತ್ರ ವಜದೇಹಿ ಮಠದ ಶ್ರೀ ರಾಜಶೇಖರಾನಂದ ಸ್ವಾಮಿಯವರು ಆಶೀರ್ವಚನ ನೀಡುತ್ತ, ಕಲಾಸೇವೆಗೆ ಕ್ಷೇತ್ರದಲ್ಲಿ ನಿರಂತರ ಪ್ರೋತ್ಸಾಹ ನೀಡಲಾಗುತ್ತಿದೆ. ಯಕ್ಷಗಾನಕ್ಕೂ ನಮ್ಮ ಬದುಕಿಗೂ ಅವಿನಾಭಾವ ಸಂಬಂಧವಿದೆ. ಮೇಳದ ಯಕ್ಷ ಕಲಾಸೇವೆ ಇನ್ನಷ್ಟು ಬೆಳಗಲಿ ಎಂದರು.
ಮಹಾಬಲೇಶ್ವರ ಭಟ್ ಅವರಿಗೆ `ಧರ್ಮ ಸೇವಾ ರತ್ನ’, ಗುರುಪ್ರಸಾದ್ ಅವರಿಗೆ `ಯಕ್ಷ ವಜ್ರ ಮೃದಂಗ ಮಂದಾರ’ ಹಾಗೂ ರಾಧಾಕೃಷ್ಣ ನಾವಡರಿಗೆ `ವಜ್ರ ಕೌಮುದಿ’ ಬಿರುದು ನೀಡಿ ಸನ್ಮಾನಿಸಲಾಯಿತು.
ಶ್ಯಾಮ್ ಭಟ್ ಸ್ವಾಗತಿಸಿ, ಸನ್ಮಾನ ಪತ್ರ ವಾಚಿಸಿ ವಂದಿಸಿದರು. ಉದ್ಯಮಿ ರವೀಂದ್ರ ಶೆಟ್ಟಿ, ಪ್ರತಿಷ್ಠಾನದ ಪ್ರಮುಖ ಹರೀಶ್ ಶೆಟ್ಟಿ ಉಪಸ್ಥಿತರಿದ್ದರು.