ಸುದ್ದಿ9ಬಂಟ್ವಾಳ : ಸಾರ್ವಜನಿಕರ ಪ್ರತಿಭಟನೆ ಎಚ್ಚರಿಕೆಯಿಂದ ಕೊನೆಗೂ ಎಚ್ಚೆತ್ತ ಹಿಂದುಳಿದ ವರ್ಗಗಳ ಮತ್ತು ಅಲ್ಪಸಂಖ್ಯಾತರ ಇಲಾಖೆಯ ಅಧಿಕಾರಿಗಳು ಪಾಣೆಮಂಗಳೂರು-ಬಂಗ್ಲೆಗುಡ್ಡೆ ಎಸ್ಸಿ/ಎಸ್ಟಿ ವಿದ್ಯಾರ್ಥಿ ನಿಲಯಕ್ಕೆ ಭಾನುವಾರ ಪೊಲೀಸ್ ಬಂದೋಬಸ್ತ್ನಲ್ಲಿ ಬೋರ್ವೆಲ್ ಕೊರೆಸುವ ಮೂಲಕ ವಿದ್ಯಾರ್ಥಿ ಬವಣೆಗೆ ಸ್ಪಂದಿಸಿದ್ದಾರೆ.
ಸ್ಥಳೀಯ ನಿವಾಸಿ ನಾರಾಯಣ ಮಯ್ಯ ಹಾಗೂ ಅವರ ಮಕ್ಕಳು ಬಂಗ್ಲೆಗುಡ್ಡೆಯಲ್ಲಿ ಕಾರ್ಯ ಚರಿಸುತ್ತಿರುವ ಸಮಾಜ ಕಲ್ಯಾಣ ಇಲಾಖೆ ಹಾಗೂ ಹಿಂದುಳಿದ ವರ್ಗಗಳ ಇಲಾಖೆಯ ವಿದ್ಯಾರ್ಥಿ ನಿಲಯಗಳ ಸರಕಾರಿ ಜಾಗವನ್ನು ತನ್ನ ಕುಮ್ಕಿ ಜಾಗವೆಂದು ವಾದಿಸುತ್ತಾ ನಿಲಯದ ಅಂಗಳ ಹಾಗೂ ದಾರಿಗೆ ಕಲ್ಲುಗಳನ್ನಿಟ್ಟು ವಿದ್ಯಾರ್ಥಿ ಗಳಿಗೆ ನಿತ್ಯ ಕಿರುಕುಳ ನೀಡುತ್ತಿದ್ದರು ಎಂದು ಆರೋಪಿಸಲಾಗಿತ್ತು. ಈ ಬಗ್ಗೆ ನಿಲಯ ಪಾಲಕ ಹಾಗೂ ಇಲಾಖಾಧಿಕಾರಿಗಳು ಪೊಲೀಸ್ ಅಧಿಕಾರಿಗಳಿಗೆ, ಜಿ ಪಂ ಸಿಇಒ ಹಾಗೂ ಜಿಲ್ಲಾಧಿಕಾರಿಗೆ ಲಿಖಿತ ದೂರು ನೀಡಿದ್ದರೂ ಸೂಕ್ತ ಕ್ರಮ ಕೈಗೊಳ್ಳುವಲ್ಲಿ ಪೊಲೀಸರು ಮೀನಮೇಷ ಎಣಿಸಿದ್ದರು. ಈ ಬಗ್ಗೆ ಸ್ಥಳೀಯರು ಸ್ವತಃ ಇಲಾಖಾ ತಾಲೂಕು ವಿಸ್ತರಣಾಧಿಕಾರಿಯನ್ನು ತರಾಟೆಗೆ ತೆಗೆದುಕೊಂಡಿದ್ದರಲ್ಲದೆ ವಿದ್ಯಾರ್ಥಿ ಗಳ ಬವಣೆಗೆ ನೀವೇ ನೇರ ಹೊಣೆಯಾಗಿದ್ದು, ತಕ್ಷಣ ಕ್ರಮ ಕೈಗೊಳ್ಳದಿದ್ದಲ್ಲಿ ಉಗ್ರ ಪ್ರತಿಭಟನೆ ನಡೆಸುವುದಾಗಿ ಎಚ್ಚರಿಸಿದ್ದರು.
ನಿಲಯಕ್ಕೆ 2013-14ನೇ ಸಾಲಿನ 1 ಲಕ್ಷ ರೂಪಾಯಿ ಅನುದಾನದಲ್ಲಿ ಮಂಜೂರಾದ ಕೊಳವೆ ಬಾವಿ ತೋಡಲು ಗುತ್ತಿಗೆದಾರರು ಇತ್ತೀಚೆಗೆ ಬೋರ್ವೆಲ್ ವಾಹನದೊಂದಿಗೆ ನಿಲಯದ ಆವರಣದೊಳಗೆ ಆಗಮಿಸಿದ ವೇಳೆ ನಾರಾಯಣ ಮಯ್ಯ ಎಂಬವರು ಕೊಳವೆ ಬಾವಿ ನಿರ್ಮಾಣಕ್ಕೆ ಅಡ್ಡಿಪಡಿಸಿದ್ದಲ್ಲದೆ ವಾಹನವನ್ನು ಹಿಂದಕ್ಕೆ ಕಳುಹಿಸಿದ್ದರು. ಖಾಸಗಿ ವ್ಯಕ್ತಿಯ ಕಿರುಕುಳ ಹಾಗೂ ಇಲಾಖಾಧಿಕಾರಿಗಳ ವಿಳಂಬ ನೀತಿಯಿಂದ ನಿಲಯದ ವಿದ್ಯಾರ್ಥಿ ಗಳು ಕುಡಿಯುವ ನೀರಿಗಾಗಿ ಬವಣೆ ಪಡುತ್ತಿದ್ದರು. ಸ್ವತಃ ವಿದ್ಯಾರ್ಥಿ ಗಳೇ ನೀರನ್ನು ಹೊತ್ತುಕೊಂಡು ಬರುತ್ತಿದ್ದ ದೃಶ್ಯವೂ ನಿತ್ಯ ಕಂಡುಬರುತ್ತಿತ್ತು. ಇದೀಗ ಸಾರ್ವಜನಿಕ ಪ್ರತಿಭಟನೆ ಎಚ್ಚರಿಕೆಯಿಂದ ಕೊನೆಗೂ ಎಚ್ಚೆತ್ತ ಅಧಿಕಾರಿಗಳು ಡೀಸಿಯಿಂದ ಪರವಾನಿಗೆ ಪತ್ರ ಪಡೆದು ಭಾನುವಾರ ಪೊಲೀಸ್ ರಕ್ಷಣೆಯಲ್ಲಿ ಕೊಳವೆ ಬಾವಿ ತೋಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಈ ವೇಳೆ ಸ್ಥಳಕ್ಕಾಗಮಿಸಿದ ನಾರಾಯಣ ಮಯ್ಯ ಹಾಗೂ ಮಕ್ಕಳು ಪೊಲೀಸರೊಂದಿಗೆ ಝಟಾಪಟಿ ನಡೆಸಿದ್ದರು. ನ್ಯಾಯಾಲಯದ ತಡೆಯಾಜ್ಞೆ ಆದೇಶ ಇಲ್ಲದೆ ಇರುವುದರಿಂದ ಮೇಲಧಿಕಾರಿಗಳ ಆದೇಶ ಪಾಲಿಸುವುದಾಗಿ ಪೊಲೀಸರು ಖಡಕ್ ಆಗಿ ಉತ್ತರಿಸಿ ವ್ಯಕ್ತಿಯನ್ನು ವಾಪಾಸು ಕಳಿಸಿದ್ದಾರೆ ಎನ್ನಲಾಗಿದೆ.